Malapenes pasaos tres años dende qu'entamara cola gaita decidime a meteme cola percusión, con Manuel Cordero de mayestru. Anque les clases solíen centrase nel tambor, a Cordero prestába-y deprendé-y téunica d'otros instrumentos al escolín (pandereta, panderu, tarrañueles...), col envís de dar puxu a la figura del percusionista asturianu tradicional. Ya que tábemos nello, al cabu d'un tiempu entamamos cola caxa, y dende esi momentu toco na estaya percusión de Noega, amás de ufiertame como tamboriteru pa pareyes o bandines. D'un tiempu pa acá ye Arsenio Ruiz quien me dirixe no que cinca a la caxa.

Prestábame aprovechar esti espaciu pa mentar una agrupación hermana, la B.G. Llariegu, que mos acompañó nun viaxe conxuntu al festival de Lorient en 2010. Nesi festival fiximos delles actuaciones como una única banda y otres por separao, y agradeciendo que cuntáremos con ellos pa esti viaxe convidáronnos a participar nel solu percusión que prepararon pa concursu. El mio discretu papel foi intercalar frases de tambor tradicional en dellos puntos de la pieza.
Tamién merecen un enllaz los collacios de Sambre, que me convidaron a tocar el tambor nun tema del so discu 'na solombra', editáu por Algamar en 2009.